گلشن حدید میں گھر سے 5 لاشیں ملنے کا معاملہ، میڈیکل رپورٹ سامنے آگئی

کراچی کے علاقے گلشنِ حدید کی ایک نجی سوسائٹی کے گھر سے میاں بیوی اور بچوں سمیت ایک ہی خاندان کے 5 افراد کی پراسرار لاشیں ملنے کے افسوسناک واقعے میں متوفین کی ابتدائی میڈیکل و پوسٹ مارٹم رپورٹ سامنے آ گئی ہے۔

میڈیکل رپورٹ کے مطابق متوفی شہازیب اور ان کی اہلیہ صبا کی موت گن شاٹ (گولی لگنے) سے ہوئی ہے، جبکہ ان کے تین بچوں شمائلہ، ایزل اور آریہ کی موت کی حتمی وجہ فی الحال معلوم نہیں ہو سکی ہے اور ان کے نمونے لیبارٹری تجزیے کے لیے ارسال کر دیے گئے ہیں۔ رپورٹ میں مزید انکشاف ہوا ہے کہ شمائلہ کے بازوؤں پر پرانے زخموں کے نشانات موجود تھے، جبکہ شہازیب اور ان کی اہلیہ کے جسم کے مختلف حصوں پر ٹیٹو بھی بنے ہوئے پائے گئے۔

ڈاکٹرز اور کیمیکل تجزیہ کاروں کے مطابق پانچوں افراد کی موت 12 اکتوبر کو دوپہر 3 بجے سے رات 8 بجے کے درمیانی وقت میں واقع ہوئی تھی، جبکہ ان تمام افراد کی لاشیں اگلے دن یعنی 13 اکتوبر کی صبح بند گھر سے برآمد ہوئی تھیں۔ پولیس اس معما کو حل کرنے کے لیے تمام زاویوں سے مزید تحقیقات کر رہی ہے۔