پاکستان کی برآمدات میں سالانہ 18 فیصد اضافہ، درآمدی بل بھی 11 فیصد بڑھ گیا

پاکستان ادارہ شماریات (PBS) نے مالی سال 2026-27 کے لیے ملک کے تجارتی اعداد و شمار جاری کر دیے ہیں، جن کے مطابق ستمبر 2026 کے دوران پاکستان کی برآمدات میں ماہانہ اور سالانہ دونوں بنیادوں پر نمایاں اضافہ ریکارڈ کیا گیا ہے، تاہم اسی عرصے کے دوران ملکی درآمدی بل میں بھی اضافہ دیکھا گیا ہے۔

ادارہ شماریات کے مطابق ستمبر 2026ء میں ملکی برآمدات ماہانہ بنیادوں پر 17 فیصد اور سالانہ بنیادوں پر 18 فیصد اضافے کے ساتھ 2 ارب 96 کروڑ ڈالر سے تجاوز کر گئیں، جبکہ گزشتہ سال ستمبر میں برآمدات کا حجم 2 ارب 50 کروڑ ڈالر تھا- اس میں سب سے بڑا حصہ ٹیکسٹائل سیکٹر کا رہا جس کی برآمدات 1 ارب 60 کروڑ ڈالر رہیں- دوسری جانب، ستمبر 2026ء میں درآمدی بل بھی 11 فیصد اضافے کے بعد 6 ارب 50 کروڑ ڈالر تک پہنچ گیا-

رپورٹ کے مطابق رواں مالی سال 2026-27ء کی پہلی سہ ماہی (جولائی تا ستمبر) کے دوران پاکستان کی مجموعی برآمدات میں گزشتہ مالی سال کے اسی عرصے کے مقابلے میں 11 فیصد اضافہ ہوا، جس سے برآمدات کا حجم 8 ارب 45 کروڑ ڈالر تک پہنچ گیا۔ تاہم، اسی سہ ماہی میں درآمدی بل میں بھی 13 فیصد کا اضافہ ریکارڈ کیا گیا جو 19 ارب 21 کروڑ ڈالر تک جا پہنچا، جس کے باعث تجارتی خسارے پر دباؤ برقرار رہا۔