کراچی میں غیر رجسٹرڈ اور مشتبہ جعلی ادویات کیخلاف ایف آئی اے کا کریک ڈاؤن

ایف آئی اے کارپوریٹ کرائم سرکل کراچی اور ڈرگ ریگولیٹری اتھارٹی آف پاکستان (ڈریپ) کی ٹیموں نے ایک مشترکہ اور کامیاب کارروائی کرتے ہوئے کراچی کے پوش علاقوں ڈیفنس فیز 7 اور کلفٹن میں واقع دو معروف میڈیکل سٹورز پر اچانک چھاپے مارے۔ اس کارروائی کے دوران دونوں میڈیکل سٹورز سے غیر رجسٹرڈ، غیر قانونی اور غیر معیاری ادویات کی ایک بڑی اور بھاری کھیپ برآمد کی گئی۔ برآمد کی جانے والی ادویات میں متعدد نامور بین الاقوامی برانڈز کی غیر رجسٹرڈ اور اسمگل شدہ ادویات بھی شامل ہیں۔

فیڈرل انویسٹی گیشن ایجنسی (ایف آئی اے) کے حکام کے مطابق برآمد شدہ ادویات کی تخمینہ مالیت تقریباً 80 لاکھ روپے بتائی گئی ہے۔ چھاپامار کارروائی کے دوران میڈیکل سٹور کے مالک سمیت دو ملزمان کو موقع پر ہی گرفتار کر لیا گیا۔ ایف آئی اے نے تمام غیر قانونی اور غیر رجسٹرڈ ادویات کو اپنے باضابطہ قبضے میں لے کر گرفتار ملزمان کے خلاف ڈرگ ایکٹ کے تحت مقدمہ درج کر لیا ہے اور واقعے کی مزید قانونی کارروائی اور تفتیش کا آغاز کر دیا گیا ہے۔