سندھ میں منکی پاکس کا ایک اور کیس رپورٹ، تعداد 100 سے متجاوز

سندھ میں منکی پاکس وائرس کا ایک اور کیس رپورٹ ہونے کے بعد صوبے میں رواں سال متاثرہ مریضوں کی مجموعی تعداد 100 سے تجاوز کر گئی ہے۔ محکمہ صحت کے ذرائع کے مطابق کراچی کی رہائشی متاثرہ خاتون کو تشویشناک حالت میں سندھ انفیکشنز ڈیزیز ہسپتال نیپا کے آئی سی یو منتقل کر دیا گیا ہے، جہاں پی سی آر ٹیسٹ کی رپورٹ میں وائرس کی تصدیق ہوئی۔ اس وقت ہسپتال میں منکی پاکس کے 7 مریض زیرِ علاج ہیں جبکہ رواں برس صوبے بھر میں اس وائرس کے باعث 12 اموات ہو چکی ہیں۔ کراچی سمیت صوبے کے مختلف اضلاع میں وائرس کی منتقلی اور کیسز کی بڑھتی ہوئی تعداد کے پیش نظر محکمہ صحت نے صورتِ حال کی کڑی نگرانی اور حفاظتی تدابیر سخت کرنے کی ہدایات جاری کی ہیں۔