کافی پینے والوں میں جسمانی چربی کم ہونے کا امکان، نئی تحقیق میں اہم انکشاف

فن لینڈ کی یونیورسٹی آف اولو میں کی جانے والی ایک نئی سائنسی تحقیق میں روزانہ کافی کے استعمال، جسمانی چربی، پٹھوں اور میٹابولزم کے درمیان مثبت تعلق کا انکشاف ہوا ہے۔ 46 سال کی عمر کے 2264 افراد پر کی جانے والی اس تحقیق کے نتائج سے معلوم ہوا کہ زیادہ کافی پینے والے افراد میں مجموعی جسمانی چربی اور اندرونی اعضا کے گرد چربی کا تناسب کم، جبکہ اسکیلیٹل مسلز کی مقدار زیادہ تھی۔ تحقیق میں یہ بات بھی سامنے آئی کہ زیادہ کافی پینے والے افراد کے خون میں تین اہم امینو ایسڈز کی سطح کم تھی، جس کا تعلق انسولین کی حساسیت میں بہتری اور ٹائپ ٹو ذیابیطس کے خطرے میں کمی سے ہے۔ تاہم، محققین نے وضاحت کی ہے کہ نتائج کافی کے استعمال اور میٹابولک صحت کے درمیان تعلق کی نشاندہی کرتے ہیں لیکن یہ براہِ راست چربی جلانے کی حتمی دلیل نہیں۔