جنرل ہسپتال سے جعلی ڈاکٹر گرفتار، مقدمہ درج کر لیا گیا

لاہور میں کوٹ لکھپت پولیس نے کارروائی کرتے ہوئے جنرل ہسپتال کے لیبر روم سے ایک جعلی ڈاکٹر کو موقع پر گرفتار کر لیا ہے۔ پولیس حکام کے مطابق ملزم ہسپتال کی حدود میں خود کو ڈاکٹر ظاہر کر کے لیبر روم میں خواتین مریضاؤں کا چیک اپ کر رہا تھا۔ شکوک و شبہات پر جب ہسپتال انتظامیہ اور پولیس نے اس کا ریکارڈ چیک کیا تو معلوم ہوا کہ ملزم کے پاس میڈیکل کی کوئی ڈگری نہیں ہے اور وہ سرے سے ڈاکٹر ہے ہی نہیں۔

ترجمان پولیس کے مطابق ملزم کی شناخت حسنین کے نام سے ہوئی ہے جو اپنے رہائشی علاقے میں بھی لوگوں کو اپنا تعارف بطور ڈاکٹر کرواتا تھا اور شہریوں کو دھوکہ دے رہا تھا۔ کوٹ لکھپت پولیس نے لیبر روم جیسے حساس شعبے میں غیر قانونی مداخلت اور جعلی معالج بن کر شہریوں کی زندگیوں سے کھیلنے پر ملزم حسنین کے خلاف نامزد مقدمہ درج کر کے قانونی کارروائی اور مزید تحقیقات کا آغاز کر دیا ہے۔