بہت گرم چائے سے غذائی نالی کے کینسر کا خطرہ بڑھنے کا انکشاف

برطانیہ میں کی جانے والی ایک نئی طبی تحقیق میں انکشاف ہوا ہے کہ انتہائی گرم چائے یا کافی پینے کی عادت غذائی نالی (Esophagus) کے کینسر کے خطرات میں نمایاں اضافہ کر سکتی ہے۔ بی بی سی کی رپورٹ کے مطابق اس جامع تحقیق میں تقریباً 10 لاکھ درمیانی عمر کے افراد کا 14 سال سے زائد عرصے تک طویل مشاہدہ اور جائزہ لیا گیا، جس کے بعد محققین نے بہت گرم مشروبات کے شوقین افراد کا موازنہ نارمل یا ہلکی گرم چائے اور کافی پینے والوں سے کیا۔

نتائج کے مطابق جو افراد باقاعدگی سے 65 ڈگری سینٹی گریڈ یا اس سے زائد درجہ حرارت پر مشروبات نوش کرتے تھے، ان میں غذائی نالی کے مخصوص کینسر ‘اسکویمس سیل کارسینوما’ (Squamous Cell Carcinoma) میں مبتلا ہونے کا خطرہ دیگر افراد کے مقابلے میں تین گنا زیادہ دیکھا گیا۔ ‘انٹرنیشنل ایجنسی فار ریسرچ آن کینسر’ بھی 65 ڈگری سینٹی گریڈ یا اس سے تیز گرم مشروبات کو سرطان کا باعث بننے والے عوامل میں شمار کرتی ہے۔ ماہرین نے مشورہ دیا ہے کہ عام طور پر چائے کا درجہ حرارت 50 سے 60 ڈگری سینٹی گریڈ کے درمیان ہونا چاہیے، لہٰذا کھولتی ہوئی گرم چائے یا کافی کو فوری پینے کے بجائے چند منٹ ٹھنڈا ہونے دینا صحت کے لیے زیادہ محفوظ ہے۔