ملک بھر کے 115 مخصوص اضلاع میں 21 تا 27 ستمبر ذیلی قومی انسدادِ پولیو مہم کا اعلان

اسلام آباد: نیشنل ایمرجنسی آپریشنز سنٹر (EOC) کے مطابق ملک بھر کے 115 مخصوص اضلاع میں 21 سے 27 ستمبر تک خصوصی ذیلی قومی انسدادِ پولیو مہم کا انعقاد کیا جائے گا۔

مہم کے دوران تربیت یافتہ پولیو ورکرز گھر گھر جا کر پانچ سال سے کم عمر کروڑوں بچوں کو معذوری سے بچانے کے لیے پولیو سے بچاؤ کے قطرے پلائیں گے۔ صوبائی و علاقائی اعداد و شمار کے مطابق پنجاب کے 13 مخصوص اضلاع میں 1 کروڑ 6 لاکھ، سندھ کے 30 اضلاع میں 1 کروڑ، خیبر پختونخوا کے 37 اضلاع میں 73 لاکھ، اور بلوچستان کے 32 اضلاع میں 23 لاکھ بچوں کو ویکسین پلانے کا ہدف مقرر کیا گیا ہے۔

اس کے علاوہ وفاقی دارالحکومت اسلام آباد میں 4 لاکھ 47 ہزار جبکہ گلگت بلتستان کے 2 مخصوص اضلاع میں 1 لاکھ 37 ہزار بچوں کو پولیو کے حفاظتی قطرے پلائے جائیں گے۔

نیشنل ای او سی کے حکام نے زور دیتے ہوئے کہا کہ بچوں کو پولیو سے محفوظ مستقبل فراہم کرنا پوری قوم کی مشترکہ ذمہ داری ہے۔ انہوں نے والدین سے اپیل کی کہ وہ ملک سے اس وائرس کے مکمل خاتمے کے لیے گھر آنے والی پولیو ٹیموں سے بھرپور تعاون کریں اور پانچ سال سے کم عمر کے ہر بچے کو قطرے لازمی پلوا کر فرض ادا کریں۔