فرنٹ لائن پولیو ورکرز کے یومیہ معاوضے میں 28 فیصد اضافے کا اعلان

پاکستان انسدادِ پولیو پروگرام نے ملک بھر میں گھر گھر جا کر خدمات انجام دینے والے فرنٹ لائن پولیو ورکرز کی فلاح و بہبود کے لیے ایک اہم قدم اٹھاتے ہوئے ان کے یومیہ معاوضے (ڈیلی الاؤنس) میں 28 فیصد نمایاں اضافے کا باضابطہ اعلان کر دیا ہے۔ قومی ایمرجنسی آپریشن سینٹر (نیشنل ای او سی) کے مطابق، یہ فیصلہ فرنٹ لائن پولیو ورکرز کے ساتھ منعقدہ خصوصاً ‘لسننگ سیشنز’ میں سامنے آنے والی تجاویز اور ان درپیش چیلنجز کا جائزہ لینے کے بعد کیا گیا ہے۔ اس معاوضے میں اضافے کا اطلاق آنے والی ستمبر کی انسدادِ پولیو مہم سے ہی شروع کر دیا جائے گا۔

اس پیشرفت پر بات کرتے ہوئے وزیراعظم کی فوکل پرسن برائے انسدادِ پولیو عائشہ رضا فاروق نے کہا کہ پولیو ورکرز کے معاوضے میں 28 فیصد اضافہ ان کی ان تھک محنت، لگن اور ملک کے دور دراز علاقوں میں خدمات کا کھلے دل سے اعتراف ہے۔ انہوں نے زور دے کر کہا کہ فرنٹ لائن پولیو ورکرز پاکستان کو پولیو سے پاک بنانے کی قومی کوششوں میں ہر اول دستے کی مانند کلیدی کردار ادا کر رہے ہیں۔ انہوں نے مزید بتایا کہ آئندہ ذیلی قومی انسدادِ پولیو مہم (SNID) 21 سے 27 ستمبر تک ملک کے 115 منتخب اضلاع میں چلائی جائے گی، جس کے دوران 3 کروڑ 10 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔