اسلام آباد کے لوگ اپنے ووٹوں سے مجھے ہٹا نہیں سکتے، یہ نظام کی خرابی ہے: مصطفیٰ کمال

وفاقی وزیرِ صحت مصطفیٰ کمال نے موجودہ انتظامی و سیاسی نظام پر کڑی تنقید کرتے ہوئے کہا ہے کہ اسلام آباد کے شہری اپنے ووٹ کی طاقت سے انہیں عہدے سے نہیں ہٹا سکتے، اور یہ اس موجودہ نظام کی سب سے بڑی خرابی ہے۔ انہوں نے میڈیا سے گفتگو کرتے ہوئے کہا کہ اگر ملک میں چھوٹے انتظامی یونٹس قائم کیے جائیں تو اختیارات براہِ راست عوام کی سطح تک منتقل ہو جائیں گے، اور اگر انتظامی یونٹ چھوٹا ہوتا تو اسلام آباد کے عوام کسی بھی وزیرِ صحت کی غلطی یا ناقص کارکردگی پر اسے عہدے سے ہٹانے کا اختیار رکھتے۔ ان کا کہنا تھا کہ اب عام عوام کو یہ بات اچھی طرح سمجھ آ چکی ہے کہ چھوٹے انتظامی نظام ہی کے ذریعے انہیں بنیادی سہولیات اور فوری انصاف مل سکتا ہے۔

اسی دوران وفاقی وزیرِ صحت مصطفیٰ کمال نے پاکستان انسٹی ٹیوٹ آف میڈیکل سائنسز (پمز) میں 10 فیصد مریضوں سے علاج کے لیے فیس وصول کیے جانے کا شدید نوٹس لیتے ہوئے پمز انتظامیہ سے مکمل تفصیلات طلب کر لی ہیں۔ انہوں نے ایگزیکٹو ڈائریکٹر پمز ڈاکٹر محمد سلمان پر شدید برہمی کا اظہار کیا اور سوال اٹھایا کہ انتظامیہ نے فیس کی مد میں حاصل ہونے والی آمدن کی تفصیلات فراہم کیوں نہیں کیں؟ مصطفیٰ کمال نے کہا کہ جب 90 فیصد مریضوں کا مفت علاج ہو رہا ہے تو باقی 10 فیصد مریضوں کا علاج مفت کیوں نہیں کیا جا سکتا؟ انہوں نے اعلان کیا کہ پمز میں تمام 100 فیصد مریضوں کو مکمل طور پر مفت طبی سہولیات کی فراہمی کے لیے وہ جلد وزیراعظم سے بات کریں گے۔