پی ایم ڈی سی کا اہم فیصلہ، افغان طلبہ کو اپنے ملک جانے کی ہدایت

پاکستان میڈیکل اینڈ ڈینٹل کونسل (PMDC) نے افغان میڈیکل و ڈینٹل طلبہ کے حوالے سے انتہائی اہم اور سخت فیصلے کرتے ہوئے پاکستان میں پہلے سے زیرِ تعلیم تمام افغان طلبہ کو فوری طور پر افغانستان واپس جانے کی ہدایت کر دی ہے۔ پی ایم ڈی سی نے ملک بھر کے تمام طبی اور دندان سازی کے کالجوں کو حکم جاری کیا ہے کہ وہ افغان طلبہ کی وطن واپسی کے لیے تمام ضروری انتظامی کارروائی جلد از جلد مکمل کریں اور متعلقہ اداروں کو ہدایت کی ہے کہ افغان طلبہ کو واپسی کے لیے درکار نو آبجیکشن سرٹیفکیٹ (NOC) بلا تاخیر جاری کیے جائیں۔ کونسل نے واضح کیا ہے کہ موجودہ تعلیمی سیشن کے دوران افغان شہریوں کو میڈیکل اور ڈینٹل پروگرامز میں کسی قسم کا نیا داخلہ دینے پر مکمل پابندی عائد کر دی گئی ہے، جبکہ افغان شہریوں کی طبی اداروں میں پلیسمنٹ، ٹرانسفر یا مائیگریشن پر بھی مکمل طور پر قدغن لگا دی گئی ہے۔

پی ایم ڈی سی نے تمام میڈیکل و ڈینٹل اداروں کو سخت ہدایات جاری کی ہیں کہ وہ افغان شہریوں کو کسی بھی نوعیت کی غیر مجاز سہولت فراہم نہ کریں اور سابقہ جاری کردہ حکومتی احکامات پر من و عن عملدرآمد یقینی بنائیں۔ اس کے ساتھ ہی جن تعلیمی اداروں نے کونسل کو تاحال تعمیلی رپورٹ جمع نہیں کروائی ہے، انہیں 3 روز کے اندر اندر مکمل تفصیلات فراہم کرنے کا حتمی الٹی میٹم دیا گیا ہے۔ کونسل نے متنبہ کیا ہے کہ ان ہدایات سے انحراف کرنے، معلومات چھپانے یا کسی بھی قسم کی غیر قانونی سہولت کاری میں ملوث پائے جانے والے اداروں کے خلاف ‘پی ایم ڈی سی ایکٹ 2022ء’ کے تحت سخت ترین ریگولیٹری و قانونی کارروائی عمل میں لائی جائے گی۔