پی ایم ڈی سی کا اہم فیصلہ، افغان طلبہ کو اپنے ملک جانے کی ہدایت

اسلام آباد: پاکستان میڈیکل اینڈ ڈینٹل کونسل (پی ایم ڈی سی) نے ایک پالیسی فیصلے کے تحت پاکستان کے میڈیکل و ڈینٹل کالجوں میں پہلے سے زیرِ تعلیم تمام افغان طلبہ کو فوری طور پر افغانستان واپس جانے کی ہدایت کر دی ہے۔

پی ایم ڈی سی کی جانب سے تمام متعلقہ میڈیکل اور ڈینٹل اداروں کو حکم دیا گیا ہے کہ وہ افغان طلبہ کی واپسی کے لیے درکار انتظامی کارروائی، بشمول این او سی (NOC) کا اجرا، فوری طور پر مکمل کریں۔ جاری کردہ ہدایات کے مطابق موجودہ تعلیمی سیشن کے دوران افغان شہریوں کو پاکستان کے میڈیکل و ڈینٹل پروگراموں میں نئے داخلے، مائیگریشن، ٹرانسفر یا پلیسمنٹ دینے پر مکمل پابندی عائد کی گئی ہے۔

ریگولیٹری باڈی نے طبی اداروں کو واضح کیا ہے کہ افغان شہریوں کو کسی بھی قسم کی غیر مجاز سہولت کاری فراہم نہ کی جائے۔ پی ایم ڈی سی نے ہدایت کی ہے کہ جن اداروں نے تعمیلی رپورٹ جمع نہیں کرائی، وہ تین روز کے اندر مکمل تفصیلات فراہم کریں۔ احکامات کی خلاف ورزی کرنے یا معلومات چھپانے والے اداروں کے خلاف ‘پی ایم ڈی سی ایکٹ 2022’ کے تحت سخت ریگولیٹری و قانونی کارروائی عمل میں لائی جائے گی۔