نیپال میں سیلابی ملبے سے کروڑوں روپے کا سونا اور نقدی برآمد

کاٹھمنڈو: نیپال میں حالیہ تباہ کن سیلاب کے بعد ملبے تلے دب جانے والی ایک بینک کی عمارت سے کروڑوں روپے مالیت کا سونا، نقد رقم اور اہم سرکاری دستاویزات باحفاظت نکال لی گئی ہیں۔

غیر ملکی میڈیا رپورٹس کے مطابق نیپال پولیس اور ریسکیو اہلکاروں نے کئی گھنٹوں کے آپریشن کے بعد ‘کرشی وکاس بینک’ کی تریشولی ڈھونگے شاخ کے ملبے تلے دبے حفاظتی لاکرز تلاش کیے۔ پولیس حکام کا کہنا ہے کہ بھاری مشینری کی مدد سے نکالے گئے ان لاکرز سے 50 کروڑ نیپالی روپے (تقریباً 500 ملین) مالیت کا سونا، ڈیڑھ کروڑ روپے نقد اور متعدد اہم دستاویزات برآمد ہوئی ہیں، جنہیں فوری طور پر محفوظ مقام پر منتقل کر دیا گیا ہے۔

پولیس کی جانب سے جاری کردہ ویڈیو میں ریسکیو اہلکاروں کو بینک کے بیسمنٹ تک پہنچنے کے لیے کئی فٹ گہرا ملبہ ہٹاتے دیکھا جا سکتا ہے۔ واضح رہے کہ نیپال میں حالیہ شدید بارشوں اور سیلاب کے باعث درجنوں عمارتیں، گاڑیاں اور تجارتی مراکز مٹی اور ملبے تلے دب گئے ہیں، جبکہ کئی مالیاتی اداروں کو بھی شدید بنیادی ڈھانچے کا نقصان پہنچا ہے۔