پنجاب اسمبلی میں کم عمر بچوں کے سوشل میڈیا اکاؤنٹس پر پابندی کی قرارداد منظور

پنجاب اسمبلی نے 16 سال سے کم عمر بچوں کے سوشل میڈیا اکاؤنٹس پر پابندی عائد کرنے سے متعلق قرارداد متفقہ طور پر منظور کر لی ہے۔ حکومتی رکن اسمبلی سارہ احمد کی جانب سے پیش کی گئی اس قرارداد میں مؤقف اختیار کیا گیا ہے کہ سوشل میڈیا کے بے قابو استعمال کی وجہ سے کم عمر بچے سائبر بُلنگ، آن لائن جنسی استحصال اور ذہنی دباؤ جیسے سنگین خطرات کا شکار ہو رہے ہیں۔ ایوان نے وفاقی حکومت اور پاکستان ٹیلی کمیونیکیشن اتھارٹی (پی ٹی اے) سے سفارش کی ہے کہ تمام ڈیجیٹل پلیٹ فارمز پر عمر کی تصدیق کا مؤثر نظام نافذ کیا جائے اور کم عمر بچوں کے اکاؤنٹس پر قانونی پابندی عائد کی جائے۔ اس کے علاوہ قرارداد میں بین الاقوامی قوانین کی مثال دیتے ہوئے سوشل میڈیا کمپنیوں کو بچوں کے تحفظ کا پابند بنانے، وفاقی و صوبائی سطح پر مربوط قانون سازی کرنے اور آلہ کار مہمات کے ذریعے والدین اور اساتذہ میں ڈیجیٹل آگاہی پیدا کرنے کا مطالبات بھی کیے گئے ہیں