خیبرپختونخوا کے وسائل پر صوبے کا حق، بقایاجات کیلئے عدالت جائینگے: سہیل آفریدی

وزیراعلیٰ خیبرپختونخوا سہیل آفریدی کی زیرِ صدارت محکمہ توانائی و برقیات کا اہم اجلاس منعقد ہوا جس میں صوبے کے ہائیڈل بجلی، تیل، گیس، ایل پی جی اور وفاق کے ذمے واجب الادا بقایاجات کا تفصیلی جائزہ لیا گیا۔ اجلاس کے دوران بریفنگ میں بتایا گیا کہ خیبرپختونخوا ملکی ہائیڈل بجلی کا 70 فیصد اور خام تیل کا 48 فیصد پیدا کرتا ہے، مگر اے جی این کازی فارمولے کے تحت این ایچ پی (NHP) کی مد میں وفاق کے ذمے صوبے کے 2300 ارب روپے سے زائد کے بقایاجات واجب الادا ہیں، جبکہ پنجاب کو خیبرپختونخوا سے زیادہ رقم فراہم کی جا رہی ہے۔ وزیراعلیٰ سہیل آفریدی نے کہا کہ اپنے پیدا کردہ وسائل کے باوجود خیبرپختونخوا کے عوام کو حقوق سے محروم رکھنا آئین کی خلاف ورزی ہے۔ انہوں نے صوبائی ٹرانسمیشن و گرڈ کمپنی کے منصوبے کو سرمایہ کار کانفرنس میں پیش کرنے کی ہدایت کرتے ہوئے واضح کیا کہ اگر وفاق کی جانب سے بقایاجات کی ادائیگی نہ کی گئی تو صوبائی حقوق کے لیے عدالتوں سے رجوع کیا جائے گا۔