27 ستمبر کو پی ٹی آئی اسلام آباد حقوق کے حصول کیلئے آ رہی ہے: بیرسٹر گوہر

چیئرمین پاکستان تحریک انصاف (پی ٹی آئی) بیرسٹر گوہر خان نے میڈیا سے گفتگو کرتے ہوئے بانی پی ٹی آئی اور بشریٰ بی بی کے کیس میں اسلام آباد ہائیکورٹ کے فیصلے کو خوش آئند قرار دیا ہے اور عدالتوں کے احکامات پر من و عن عملدرآمد کا مطالبہ کیا ہے۔ انہوں نے کہا کہ بانی پی ٹی آئی سے گزشتہ 320 روز سے کوئی ملاقات نہیں کروائی گئی، حالانکہ وہ 3 سال سے قید ہیں اور ان پر 300 کیسز بنائے گئے ہیں، اس لیے اعتماد کی فضا بحال کرنے کے لیے انہیں فوری ہسپتال منتقل کر کے علاج کی سہولت دی جائے۔ بیرسٹر گوہر نے 27 ستمبر کے پرامن احتجاج کا اعلان کرتے ہوئے کہا کہ اس کی قیادت وزیراعلیٰ خیبرپختونخوا سہیل آفریدی کریں گے اور پی ٹی آئی ریاست يا صوبائی وسائل استعمال کیے بغیر محض اپنے آئینی حقوق کے لیے نکل رہی ہے۔ انہوں نے متنبہ کیا کہ اگر سیاسی ڈائیلاگ کے دروازے بند رکھے گئے اور سسٹم کو ری سیٹ نہ کیا گیا تو عوام خود آگے بڑھ کر ری سیٹ کر دے گی۔