بلند ترین اونچائی تک بلابنگ جمپ کا نیا ریکارڈ قائم

برونن/زیورخ: سوئٹزرلینڈ کے خوبصورت علاقے برونن (Schwyz) میں تین کھلاڑیوں نے پانی پر تیرتے ہوئے ایک دیوہیکل ایئر بیگ پر چھلانگ لگا کر اپنے چوتھے ساتھی کو 92.58 فٹ کی سنسنی خیز بلندی تک اچھال کر گنیز ورلڈ ریکارڈ توڑ دیا۔

کھیلوں کی دنیا میں ’بلابنگ‘ (Blobbing) کے نام سے معروف اس ایڈونچر کھیل کے دوران سوئس کھلاڑی لوک سیگینٹلر، جرمن لینارٹ فلورکزاک اور امریکی ٹرسٹان کوہن نے بیک وقت اونچائی سے بڑے ایئر بیگ پر چھلانگ لگائی۔ اس زوردار اثر کے نتیجے میں ایئر بیگ کے دوسرے سرے پر موجود سوئس کھلاڑی روبن سٹینر فضا میں 92.58 فٹ کی ریکارڈ بلندی پر اچھل کر پانی میں جا گرے۔

ایڈرین بومن، جو پینٹ بال اور واٹر اسپورٹس ایونٹس کے ماہر ہیں، نے گنیز ورلڈ ریکارڈ کو بتایا کہ روبن پہلی بار چار سال قبل ان کے ایک ایونٹ میں آئے تھے، جہاں انہیں پہلی بار ایئر بیگ سے لانچ کیا گیا تھا۔ انہوں نے فوری طور پر اس کھیل میں غیر معمولی ہنر کا مظاہرہ کیا جس کے بعد سے وہ باقاعدگی سے بلابنگ کے مقابلوں میں حصہ لیتے رہے۔ روبن کے اس 92.58 فٹ کے حیران کن اچھال نے 2012 میں قائم کردہ 72 فٹ اور 2.14 انچ کے پرانے عالمی ریکارڈ کو پاش پاش کر دیا۔