قومی کرکٹ ٹیم کے اعزاز میں پاکستان ہاؤس لندن میں عشائیہ، محسن نقوی کی بھی شرکت

پاکستان ہاؤس لندن میں دورۂ انگلینڈ اور ٹی 20 ورلڈ کپ کی تیاریوں کے سلسلے میں قومی کرکٹ ٹیم کے اعزاز میں ایک پروقار عشائیے کا اہتمام کیا گیا، جس کی میزبانی برطانیہ میں پاکستان کے ہائی کمشنر ڈاکٹر محمد فیصل نے کی۔ تقریب میں چیئرمین پی سی بی و وفاقی وزیر داخلہ محسن نقوی، میئر لندن صادق خان اور پاکستان میں تعینات برطانوی ہائی کمشنر جین میریٹ سمیت اعلیٰ حکام اور برطانوی-پاکستانی کمیونٹی کی اہم شخصیات نے شرکت کی۔ چیئرمین پی سی بی محسن نقوی نے کھلاڑیوں کو دباؤ سے آزاد ہو کر بہترین کھیل پیش کرنے کی تاکید کی، جبکہ میئر لندن نے کپتان بابر اعظم اور قومی فاسٹ بولرز کی تعریف کرتے ہوئے ٹیم کے لیے نیک خواہشات کا اظہار کیا۔ اس موقع پر برطانوی کمیونٹی کے ساتھ کھلاڑیوں کے ملنے اور یادگاری تصاویر بنوانے کا سلسلہ بھی جاری رہا۔