پنجاب اسمبلی میں سندھ طاس معاہدہ، ماحولیاتی آلودگی سمیت متعدد قراردادیں منظور

پنجاب اسمبلی کے اجلاس میں بھارت کی جانب سے سندھ طاس معاہدے کی خلاف ورزی کے خلاف مذمتی قرارداد متفقہ طور پر منظور کر لی گئی ہے، جس میں عالمی ثالثی عدالت کے فیصلے کا خیرمقدم کرتے ہوئے ملکی آبی حقوق کے تحفظ کے عزم کا اعادہ کیا گیا۔ ایوان نے اقلیتی قیدیوں کو مذہبی تعلیم و امتحانات کی سہولت فراہم کر کے ان کی سزاؤں میں قانونی رعایت دینے اور ڈیری فارمنگ کے فضلے سے پھیلنے والی آبی و ماحولیاتی آلودگی کے تدارک سے متعلق قراردادیں بھی متفقہ طور پر منظور کیں۔ اس کے علاوہ صفائی ورکرز کی حفاظت کے بل کو مالی و قانونی مشاورت کے بعد دوبارہ لانے کی ہدایت کی گئی۔ اجلاس کے دوران اپوزیشن کی جانب سے راولپنڈی میں مون سون کی بارشوں اور حکومتی اقدامات پر شدید تنقید بھی سامنے آئی، جس کے بعد اجلاس بدھ کی دوپہر تک کے لیے ملتوی کر دیا گیا۔