ملتان کرکٹ سٹیڈیم میں یوم آزادی کی مناسبت سے تقریبات، کرکٹ سٹارز ان ایکشن

ملتان کرکٹ سٹیڈیم میں یومِ آزادی کی مناست سے پروقار اور پرجوش تقریبات کا انعقاد کیا گیا ہے، جہاں ملکی کرکٹ کے نامور ستارے میدان میں اپنے فن کا مظاہرہ کر رہے ہیں۔ چیئرمین پاکستان کرکٹ بورڈ (PCB) محسن نقوی نے سماجی رابطے کی ویب سائٹ ‘ایکس’ (سابقہ ٹوئٹر) پر اپنے خصوصی پیغام میں بتایا کہ ملتان کرکٹ سٹیڈیم میں یومِ آزادی کی خوشی میں رات بھر جشن اور خصوصی تقریبات کا سلسلہ جاری رہے گا۔ اس موقع پر ‘نیشنل چیمپئنز کپ’ کے تحت پاکستان گرینز اور پاکستان بلیوز کے درمیان ایک سنسنی خیز میچ بھی کھیلا جا رہا ہے، جس میں صاحبزادہ فرحان، عرفات منہاس، حسن علی، سفیان مقیم، فخر زمان، شاداب خان، فہیم اشرف اور نسیم شاہ جیسے قومی اسٹارز ایکشن میں نظر آ رہے ہیں۔

چیئرمین پی سی بی محسن نقوی کے مطابق کرکٹ میچ کے اختتام پر شائقین کی تفریح کے لیے معروف گلوکار ندیم لونے والہ اپنے فن کا مظاہرہ کرتے ہوئے ملی نغمے اور گانے پیش کریں گے۔ پی سی بی انتظامیہ نے یومِ آزادی کی خوشیوں میں عوام کو شریک کرنے کے لیے سٹیڈیم میں شائقینِ کرکٹ کا داخلہ بالکل مفت رکھا ہے اور ملتان کے شہریوں کو ان شاندار تقریبات اور میچ میں فیملیز کے ساتھ بھرپور شرکت کی کھلی دعوت دی ہے۔