انڈونیشیا میں زلزلے سے جانی نقصان پر وزیراعظم کا اظہار افسوس

وزیراعظم پاکستان محمد شہباز شریف نے برادر اسلامی ملک انڈونیشیا میں آنے والے شدید زلزلے کے نتیجے میں ہونے والے قیمتی جانوں کے ضیاع اور بڑے پیمانے پر ہونے والی مالی تباہی پر دلی رنج و غم کا اظہار کیا ہے۔ سماجی رابطے کی ویب سائٹ ایکس (سابقہ ٹوئٹر) پر اپنے ایک بیان میں وزیراعظم نے انڈونیشیا کے صدر پرابوو سوبیانتو، حکومت اور متاثرہ خاندانوں سے دلی تعزیت کی۔ انہوں نے کہا کہ اس مشکل اور آزمائش کی گھڑی میں پورا پاکستان اپنے انڈونیشی بھائیوں اور بہنوں کے ساتھ مکمل یکجہتی کے ساتھ کھڑا ہے۔

وزیراعظم شہباز شریف نے اپنے پیغام میں کہا کہ قدرتی آفت سے متاثر ہونے والے تمام افراد اور سوگوار خاندان ہماری ہمدردیوں اور دعاؤں میں شامل ہیں، جبکہ زلزلے کے نتیجے میں زخمی ہونے والوں کی جلد اور مکمل صحت یابی کے لیے دعاگو ہیں۔ انہوں نے مزید کہا کہ پاکستان اور انڈونیشیا کے مابین دیرینہ اور برادرانہ تعلقات قائم ہیں، اور پاکستان اس دشوار وقت میں انڈونیشی عوام اور حکومت کے لیے صبر، حوصلے اور ثابت قدمی کی دعا کرتا ہے۔