لبنانی حکومت فوج کو اسرائیلی دباؤ میں لانے کی کوشش کر رہی ہے: حزب اللہ

حزب اللہ کے سربراہ شیخ نعیم قاسم نے لبنانی حکومت کی پالیسیوں پر شدید تنقید کرتے ہوئے الزام عائد کیا ہے کہ حکومت لبنانی فوج کو اسرائیلی دباؤ میں لانے کی کوشش کر رہی ہے۔ انہوں نے اسرائیل اور امریکا کے ساتھ طے پانے والے نام نہاد ‘فریم ورک معاہدے’ کو اسرائیلی احکامات کا مجموعہ قرار دیتے ہوئے کہا کہ اس معاہدے کے تحت تل ابیب کو وہ تمام مطالبات تسلیم کر کے دیے جا رہے ہیں جو وہ چاہتا ہے، جس کے نتیجے میں لبنان اپنی قومی خودمختاری سے عمللاً دستبردار ہو رہا ہے۔

شیخ نعیم قاسم نے اپنے بیان میں واضح کیا کہ سات ادوار پر مشتمل طویل مذاکرات کے باوجود لبنان کو کچھ حاصل نہیں ہوا، اس لیے لبنانی حکام کو چاہیے کہ وہ موجودہ مذاکراتی طریقہ کار پر فوری نظرثانی کریں۔ انہوں نے کہا کہ اس وقت لبنانی فوج کو اسرائیلی حملوں اور غیر معمولی دباؤ کا سامنا ہے جو کسی صورت قابلِ قبول نہیں ہے۔

حزب اللہ کے سربراہ کا مزید کہنا تھا کہ اسرائیل لبنانی فوج کی نقل و حرکت، تعیناتی اور کارروائیوں کی نگرانی کے لیے تحقیقاتی کمیٹی مسلط کر رہا ہے۔ انہوں نے خبردار کیا کہ اگر موجودہ طریقہ کار اور لائحہ عمل بدستور جاری رہا تو اس سے لبنان کی خودمختاری، آزادی اور قومی وقار کو مزید شدید نقصان پہنچے گا۔