پاکستان نے ایشین نیٹ بال چیمپئن شپ 2026 پلیٹ ڈویژن جیت لی

پاکستان ویمنز نیٹ بال ٹیم نے ہانگ کانگ میں منعقدہ ایشین نیٹ بال چیمپئن شپ پلیٹ ڈویژن کے فائنل میں تھائی لینڈ کو ایک سنسنی خیز مقابلے کے بعد 50 کے مقابلے میں 55 پوائنٹس سے شکست دے کر فائنل کا تاج اپنے نام کر لیا ہے۔ پوری چیمپئن شپ اور بالخصوص فائنل میچ کے دوران قومی کھلاڑیوں نے شاندار ٹیم ورک، بہترین نظم و ضبط اور غیر متزلزل عزم کا مظاہرہ کرتے ہوئے حریف ٹیم پر اپنا دباؤ برقرار رکھا اور فتح حاصل کی۔

پاکستان کی اس تاریخی کامیابی میں صبا نور انور، مایا، لیا رضا شاہ، حنا چوہدری، سرینا نسیم، جسمین، فرح، نورالعین اور سمایا صفدر نے اہم کردار ادا کیا اور اپنے بہترین کھیل سے ٹیم کو فتح دلائی۔ اس شاندار کامیابی کے نتیجے میں پاکستان نے 2028ء میں سنگاپور میں منعقد ہونے والی اگلی ایشین نیٹ بال چیمپئن شپ کے مرکزی ‘کپ ڈویژن’ کے لیے بھی باضابطہ کوالیفائی کر لیا ہے۔