بھارتی حکام نے میرواعظ عمر فاروق کو ایک بار پھر گھر میں نظر بند کردیا

بھارت کے غیر قانونی زیرِ قبضہ جموں و کشمیر میں قابض انتظامیہ نے آل پارٹیز حریت کانفرنس (APHC) کے سینئر رہنما اور کشمیری مذہبی قائد میر واعظ عمر فاروق کو ایک بار پھر ان کی رہائش گاہ پر نظر بند کر دیا ہے۔ کشمیر میڈیا سروس کے مطابق میر واعظ عمر فاروق نے ربیع الاول کے بابرکت مہینے کے آغاز پر بار بار عائد کی جانے والی ان من مانی پابندیوں پر سخت ردِعمل کا اظہار کرتے ہوئے ان کی شدید مذمت کی اور کہا کہ ہر جمعہ کو انہیں جامع مسجد سرینگر میں عبادات اور خطبہ سے روکنا انتہائی افسوسناک اور قابض حکام کا غیر جمہوری رویہ ہے۔ انہوں نے وادی میں “حالات معمول پر ہونے” کے بھارتی بیانیے پر سوال اٹھاتے ہوئے کہا کہ اگر واقعی حالات نارمل ہیں تو پھر انہیں عوام سے ملنے اور جامع مسجد جانے سے کیوں روکا جاتا ہے، جس سے ثابت ہوتا ہے کہ بھارتی حکام کو خود اپنے ہی دعوؤں پر اعتماد نہیں ہے۔

ان تمام تر پابندیوں کے باوجود میر واعظ عمر فاروق نے مقبوضہ جموں و کشمیر اور دنیا بھر کے مسلمانوں کو ربیع الاول کے بابرکت مہینے کی آمد پر مبارکباد پیش کی۔ انہوں نے اپنے پیغام میں زور دیا کہ یہ بابرکت موقع نبی کریم حضرت محمد ﷺ کی سیرتِ طیبہ، سنتِ مبارکہ، عدل، شفقت اور حسنِ اخلاق کے پیغام پر عمل پیرا ہونے اور ان سے اپنے تعلق کو مضبوط کرنے کا تقاضا کرتا ہے۔ دریں اثنا، جامع مسجد کی انتظامی تنظیم انجمن اوقاف نے اعلان کیا ہے کہ صدیوں پرانی دینی روایت کے مطابق 17 اگست (3 ربیع الاول) بروز پیر، خواجہ دگر کے خصوصی موقع پر میر واعظ عمر فاروق سرینگر کے خواجہ بازار میں واقع تاریخی خانقاہِ نقشبند صاحب میں ظہر تا عصر اہم خصوصی خطاب کریں گے۔