ایرانی کرکٹ ایسوسی ایشن کے وفد کا پی سی بی ہیڈکوارٹرز کا دورہ

اسلامی جمہوریہ ایران کرکٹ ایسوسی ایشن کے وفد نے پاکستان کرکٹ بورڈ (پی سی بی) کے ہیڈکوارٹرز قذافی اسٹیڈیم اور نیشنل کرکٹ اکیڈمی کا دورہ کیا، جہاں انہوں نے پی سی بی کے چیف آپریٹنگ آفیسر سمیر احمد سید اور پی ایس ایل کے سی ای او سلمان نصیر سے اہم ملاقات کی۔ اس ملاقات میں دونوں ممالک کے درمیان کرکٹ کے فروغ، انفراسٹرکچر کی ترقی اور باہمی تعاون کے مختلف امور پر تفصیلی تبادلہ خیال کیا گیا۔ پی سی بی نے ایران کی جونیئر اور سینئر ٹیموں کو پاکستانی کوچز کے ذریعے تربیتی معاونت اور کوچنگ کے علم و تجربات منتقل کرنے پر آمادگی ظاہر کی ہے۔ اس کے علاوہ ایرانی کرکٹ کے لیے کھیلوں کے سامان کی فراہمی، کھلاڑیوں کی ضروریات کی نشاندہی اور قذافی اسٹیڈیم و نیشنل کرکٹ اکیڈمی کی جدید سہولیات کے جائزے کے بعد دونوں بورڈز نے کرکٹ کی ترقی کے لیے مشترکہ کوششیں جاری رکھنے پر اتفاق کیا۔