تیل کی قیمتیں کم رکھنا امریکا کی پہلی ، ایران کو جوہری ہتھیاروں سے روکنا دوسری ترجیح ہے: جے ڈی وینس

امریکا کے نائب صدر جے ڈی وینس نے کہا ہے کہ اس وقت امریکی انتظامیہ کی سب سے پہلی اور اہم ترین ترجیح امریکی عوام کے لیے تیل اور گیس کی قیمتوں کو کنٹرول میں رکھنا ہے، جبکہ دوسری بڑی ترجیح ایران کو کسی بھی صورت ایٹمی ہتھیار حاصل کرنے سے روکنا ہے۔ امریکی نیوز نیٹ ورک ‘فاکس نیوز’ کو دیے گئے ایک انٹرویو میں نائب صدر نے دعویٰ کیا کہ واشنگٹن خطے میں جاری کشیدگی کے باوجود ان دونوں اہم اہداف کو حاصل کر رہا ہے۔

جے ڈی وینس نے جغرافیائی و سیاسی صورتحال کی پیچیدگی کی جانب اشارہ کرتے ہوئے کہا کہ اس وقت حالات میں فطری طور پر ایک غیر یقینی کی کیفیت پائی جاتی ہے۔ انہوں نے ایرانی حکام کے رویے کو غیر متوقع قرار دیتے ہوئے موقف اپنایا کہ تہران کی جانب سے اکثر اوقات ان وعدوں اور معاہدوں کی پاسداری نہیں کی جاتی جو انہوں نے طے کیے ہوتے ہیں۔ تاہم ان کا کہنا تھا کہ امریکا سفارتی، معاشی اور فوجی ذرائع کا حکمت عملی کے ساتھ استعمال جاری رکھے ہوئے ہے تا کہ انرجی مارکیٹ میں استحکام اور خطے میں امریکی مفادات کا تحفظ ممکن بنایا جا سکے۔