اقلیتیں معاشرے کا حسن، عزت اور تحفظ پر سمجھوتا نہیں ہوگا: مریم نواز

وزیراعلیٰ پنجاب مریم نواز شریف نے اقلیتوں کے قومی دن کے موقع پر اپنے خصوصی پیغام میں کہا ہے کہ قائداعظم کا پاکستان سب کا وطن ہے، جہاں تمام شہری بلا تفریقِ مذہب و عقیدہ محفوظ، آزاد اور مساوی حقوق کے حامل ہیں۔ انہوں نے ملک کی تعمیر و ترقی اور خوشحالی میں اقلیتی برادری کے کردار کو سراہتے ہوئے انہیں زبردست خراجِ تحسین پیش کیا

مریم نواز شریف نے کہا کہ اقلیتیں پاکستانی معاشرے کا حسن اور سر کا تاج ہیں، اور ان کی عزت، ناموس، تحفظ اور ترقی پر حکومت کبھی سمجھوتہ نہیں کرے گی۔ انہوں نے پنجاب حکومت کے تاریخی اقدامات پر روشنی ڈالتے ہوئے بتایا کہ صوبے میں پہلی بار “مینارٹی کارڈ” متعارف کرایا گیا ہے، جس کے تحت مستحق اقلیتی افراد کو ساڑھے 10 ہزار روپے سہ ماہی مالی امداد فراہم کی جا رہی ہے۔

وزیراعلیٰ نے مزید کہا کہ پنجاب کو پہلا سکھ میرج ایکٹ 2024 منظور کرنے کا اعزاز حاصل ہوا ہے جس سے “آنند کارج” کو قانونی حیثیت ملی، جبکہ طویل عرصے سے زیر التوا ہندو میرج ایکٹ 2017 کی بھی منظوری دے دی گئی ہے۔ اس کے علاوہ تاریخی گوردواروں، مندروں اور گرجا گھروں کی بحالی، اقلیتی طلبہ کے لیے اسکالرشپس، یوحنا آباد میں ہنر مند کورسز، اور مذہبی تہواروں (بیساکھی، ہولی، دیوالی، کرسمس، ایسٹر) کو سرکاری سطح پر منانے کو حکومت کی اہم ترجیحات میں شامل کیا گیا ہے۔