یوٹیوب نے اے آئی سے تیار کردہ ویڈیوز کے خلاف پالیسیاں مزید سخت کر دیں

ویڈیو شیئرنگ پلیٹ فارم یوٹیوب نے مصنوعی ذہانت (AI) سے تیار کردہ غیر معیاری، اسپام اور نقصان دہ مواد کی حوصلہ شکنی کے لیے اپنی پالیسیاں مزید سخت اور واضح کر دی ہیں۔ کمپنی کے مطابق نئی اپ ڈیٹ کا مقصد اے آئی ٹولز کے استعمال کو روکنا نہیں، بلکہ بار بار دہرائے جانے والے اور غیر معیاری مواد کی نشاندہی کرنا ہے۔ یوٹیوب نے واضح کیا کہ ایسی ویڈیوز پلیٹ فارم پر موجود تو رہ سکتی ہیں، لیکن ان سے آمدنی حاصل نہیں کی جا سکے گی اور نہ ہی انہیں صارفین کی فیڈ میں بطور سفارش (ریکومینڈیشن) دکھایا جائے گا۔ یوٹیوب نے تخلیق کاروں پر زور دیا ہے کہ وہ ویڈیوز تیار کرتے وقت معیار، تناظر اور اپنی حقیقی تخلیقی کاوشوں کو لازمی شامل کریں تاکہ مفید اے آئی مواد اور اسپام میں فرق برقرار رکھا جا سکے۔