مصر میں مسافر ٹرین حادثہ، متعدد بوگیاں پٹری سے اتر گئیں، 64 افراد زخمی

مصر کے صوبہ جیزہ میں قاہرہ سے اسوان جانے والی مسافر ٹرین کی متعدد بوگیاں پٹری سے اترنے کے نتیجے میں کم از کم 64 افراد زخمی ہو گئے ہیں۔ خبر ایجنسی کے مطابق یہ افسوسناک حادثہ جرزا جنکشن کے قریب پیش آیا۔ واقعے کی اطلاع ملتے ہی مصری وزارتِ صحت نے امدادی کارروائیوں کا آغاز کرتے ہوئے زخمیوں کو فوری طور پر نجی اور سرکاری ہسپتالوں میں منتقل کرنے کے لیے 52 ایمبولینسز موقع پر روانہ کیں۔ مصری وزیرِ صحت خالد عبدالغفار نے تمام قریبی ہسپتالوں کو ہائی الرٹ رہنے کی ہدایت جاری کرتے ہوئے کہا ہے کہ حادثے کے تمام متاثرین کو بہترین اور ضروری طبی سہولیات بلا تاخیر فراہم کی جا رہی ہیں۔