ویرات کوہلی کی نجی ملاقات خفیہ نہ رہ سکی، تصاویر سوشل میڈیا پر وائرل

بھارتی کرکٹ ٹیم کے سٹار بیٹر ویرات کوہلی کی لندن کے ایک کیفے میں بغیر اجازت لی گئی تصاویر سوشل میڈیا پر وائرل ہونے کے بعد ان کی پرائیویسی ایک بار پھر خبروں کی زینت بن گئی ہے۔ رائل چیلنجرز بنگلورو میں ان کے ساتھ کھیلنے والے انگلش بیٹر جارڈن کاکس نے برطانوی اخبار کو بتایا کہ گزشتہ ماہ لندن کے ایک کیفے میں ان کی ویرات کوہلی سے ملاقات ہوئی تھی جہاں دونوں نے کرکٹ اور دباؤ سے نمٹنے پر تفصیلی گفتگو کی۔ جارڈن کاکس کے مطابق، کیفے میں ملاقات کے دوران کسی نے انہیں پریشان نہیں کیا، تاہم چند گھنٹے بعد ویرات کوہلی نے انہیں پیغام بھیجا اور سوشل میڈیا پر وائرل ہونے والی تصاویر کی طرف توجہ دلائی۔ جارڈن کاکس نے ویرات کوہلی کی شخصیت کی تعریف کرتے ہوئے کہا کہ وہ اپنی نجی زندگی کو عوامی توجہ سے دور رکھ کر عام لوگوں کی طرح پرسکون وقت گزارنا چاہتے ہیں، لیکن ان کی بے پناہ شہرت کے باعث ایسا ممکن نہیں ہو پاتا۔ واضح رہے کہ انٹرنیشنل کرکٹ سے جزوی ریٹائرمنٹ کے بعد ویرات کوہلی ان دنوں اپنی اہلیہ انوشکا شرما اور بچوں کے ساتھ زیادہ تر وقت لندن میں ہی گزارتے ہیں۔