ومبلڈن: سنر نے جوکووچ کا 25ویں گرینڈ سلیم کا خواب توڑ دیا

ومبلڈن ٹینس ٹورنامنٹ کے سیمی فائنل میں دفاعی چیمپیئن یانک سنر نے شاندار کارکردگی کا مظاہرہ کرتے ہوئے سربیا کے تجربہ کار ٹینس اسٹار نوواک جوکووچ کو اسٹریٹ سیٹس میں شکست دے کر فائنل میں جگہ بنا لی ہے۔ اطالوی ٹینس اسٹار یانک سنر نے پورے میچ میں جوکووچ پر اپنا دباؤ برقرار رکھا اور یہ مقابلہ 4-6، 4-6 اور 4-6 سے اپنے نام کیا۔ اس شکست کے ساتھ ہی 39 سالہ نوواک جوکووچ کا ریکارڈ 25واں گرینڈ سلیم ٹائٹل جیتنے کا خواب ایک بار پھر ادھورا رہ گیا۔ جوکووچ پورے میچ میں سنر کے جارحانہ کھیل کا مؤثر جواب نہ دے سکے، جبکہ سنر نے 16 ایسز کی مدد سے اپنی سروس پر مکمل برتری قائم رکھی اور پہلی سروس پر صرف چھ پوائنٹس گنوائے۔

دوسری جانب، ایونٹ کے دوسرے سیمی فائنل میں سیکنڈ سیڈ جرمنی کے الیگزینڈر زویریف نے برطانوی وائلڈ کارڈ انٹری آرتھر فیری کی شاندار مہم کا خاتمہ کرتے ہوئے 0-7(6)، 2-6 اور 4-6 سے کامیابی حاصل کر لی۔ اس تاریخی فتح کے بعد الیگزینڈر زویریف 1995 میں بورس بیکر کے بعد ومبلڈن مینز سنگلز کے فائنل میں پہنچنے والے پہلے جرمن کھلاڑی بن گئے ہیں۔ اب اتوار کو ہونے والے فائنل معرکے میں یانک سنر اپنے کیریئر کے پانچویں گرینڈ سلیم ٹائٹل کے لیے میدان میں اتریں گے، جبکہ زویریف فرنچ اوپن کے بعد مسلسل دوسرا بڑا گرینڈ سلیم ٹائٹل اپنے نام کرنے کی بھرپور کوشش کریں گے۔