بلوچستان حکومت فوری مستعفی ہو اور لاپتہ افراد کو عدالتوں میں پیش کیا جائے,مصطفیٰ نواز کھوکھر

معروف سیاستدان مصطفیٰ نواز کھوکھر نے بلوچستان کے حالیہ بحران اور آزاد کشمیر کی صورتحال پر گہری تشویش کا اظہار کرتے ہوئے کہا ہے کہ بلوچستان کے حالات پر ملک میں بسنے والا ہر شہری رنجیدہ ہے۔ انہوں نے حکومت کو کڑی تنقید کا نشانہ بناتے ہوئے الزام عائد کیا کہ وزیر اعظم کوئٹہ کے دورے پر تو گئے لیکن وہ شہداء کے ورثاء اور زخمیوں کی عیادت کے لیے نہیں گئے، جس سے واضح ہوتا ہے کہ حکومت پاکستان کے حقیقی مسائل سے مکمل لا تعلق ہو چکی ہے۔ مصطفیٰ نواز کھوکھر نے ‘تحریکِ تحفظِ آئینِ پاکستان’ کے اہم مطالبات سامنے رکھتے ہوئے زور دیا کہ بلوچستان حکومت فوری طور پر مستعفی ہو، تمام لاپتہ افراد کو عدالتوں میں پیش کیا جائے، حکومت وہاں بنائے گئے مبینہ ‘ڈیتھ اسکواڈز’ سے دستبردار ہو اور تمام سیاسی اسیران کو فوری رہا کیا جائے۔ انہوں نے مزید کہا کہ اس خطے میں ‘ہارڈ اسٹیٹ’ (سخت گیر ریاست) کا قیام ممکن نہیں ہے، اور آزاد کشمیر کی حساسیت کو بھی مدنظر نہیں رکھا جا رہا۔ انہوں نے آزاد کشمیر میں انتخابات ملتوی کرنے کے مطالبے کی حمایت کرتے ہوئے حکومت کو مشورہ دیا کہ وہ فوری طور پر جوائنٹ ایکشن کمیٹی کے ساتھ بامقصد بات چیت کا آغاز کرے۔