شاہد آفریدی کا شاپور زدران کے انتقال پر اظہارِ افسوس

پاکستان کرکٹ ٹیم کے سابق کپتان اور مایہ ناز آل راؤنڈر شاہد آفریدی نے سوشل میڈیا پر اپنے ایک خصوصی پیغام میں افغان کرکٹ کے حوالے سے جذبات کا اظہار کرتے ہوئے پشتون ثقافت، عزت اور وقار کو زبردست خراجِ تحسین پیش کیا ہے۔ شاہد آفریدی کا کہنا تھا کہ موت ہر انسان کو آنی ہے، مگر پشتونوں کی عزت اور وقار کبھی نہیں مرتا؛ موت جسم کو جدا کر سکتی ہے مگر پشتونوں کا معاشرتی ضابطۂ حیات ہمیشہ زندہ رہتا ہے۔ واضح رہے کہ افغان کرکٹ کی تاریخ میں بائیں ہاتھ کے فاسٹ بولر شاپور زدران کو ایک تاریخی حیثیت حاصل ہے، جنہوں نے 44 ون ڈے اور 36 ٹی ٹوئنٹی انٹرنیشنل میچز میں افغانستان کی نمائندگی کی اور 2015ء کے آئی سی سی کرکٹ ورلڈ کپ میں اسکاٹ لینڈ کے خلاف فاتحانہ رنز بنا کر اپنی ٹیم کو ورلڈ کپ کی پہلی تاریخی اور یادگار فتح دلائی تھی۔