دورہ ویسٹ انڈیز کی تیاریاں؛ راولپنڈی میں پاکستان ٹیسٹ ٹیم کا تربیتی کیمپ شروع

دورہ ویسٹ انڈیز کی تیاریوں کے لیے پاکستان ٹیسٹ اسکواڈ کے پری سیریز ٹریننگ کیمپ کا راولپنڈی کرکٹ اسٹیڈیم میں باقاعدہ آغاز ہو گیا ہے۔ کیمپ کے پہلے روز ٹیسٹ اسکواڈ کے کھلاڑیوں نے ہیڈ کوچ سرفراز احمد، بیٹنگ کوچ اسد شفیق اور بولنگ کوچ عمر گل کی زیرِ نگرانی تین گھنٹے طویل سخت ٹریننگ سیشن میں حصہ لیا۔ کپتان بابر اعظم سمیت دیگر کھلاڑیوں نے پریکٹس وکٹوں پر نیٹس سیشن کے دوران بیٹنگ، بولنگ اور فیلڈنگ کی خصوصی ڈرلز کیں۔ ویسٹ انڈیز کی کنڈیشنز سے ہم آہنگ ہونے کے لیے پاکستان ٹیسٹ ٹیم جمعہ اور ہفتہ کو دو روزہ انٹرا اسکواڈ سناریو میچ بھی کھیلے گی۔ واضح رہے کہ پاکستان اور ویسٹ انڈیز کے درمیان آئی سی سی ورلڈ ٹیسٹ چیمپئن شپ کے تحت دو ٹیسٹ میچوں کی سیریز 25 جولائی سے 10 اگست تک برائن لارا کرکٹ اکیڈمی ٹوروبا اور کوئینز پارک اوول پورٹ آف اسپین میں کھیلی جائے گی۔