میکسیکو کی فتح کے بعد شائقین کا جشن، زمین میں زلزلے کی لہریں ریکارڈ

ورلڈ کپ کے ناک آؤٹ مرحلے میں ایکواڈور کے خلاف میکسیکو کی شاندار فتح کے بعد شائقین کے جنونی جشن نے زمین کو ہلا کر رکھ دیا، جس کے باعث زلزلہ پیما آلات (سیسموگراف) پر نمایاں ارتعاشات ریکارڈ کی گئیں۔ دوسری جانب فتح کے جشن کے دوران افسوسناک واقعہ بھی پیش آیا جہاں ہجوم میں بھگدڑ مچنے سے 3 افراد ہلاک ہو گئے۔

میکسیکو کے ڈیجیٹل پلیٹ فارم فار ارلی وارننگ اینڈ کمپری ہینسو رسک مینجمنٹ کے مطابق، میچ کے دوران پہلے جولین کوئینونیس اور بعد ازاں راؤل خیمنیز کے شاندار گول کرنے پر اسٹیڈیم اور باہر موجود ہزاروں شائقین ایک ساتھ اچھل پڑے اور شور مچایا۔ اس غیر معمولی جوش و خروش اور لاکھوں لوگوں کے بیک وقت اچھلنے سے مقامی علاقے میں تیز وائبریشن پیدا ہوئی، جسے متعدد سیسموگرافز نے باقاعدہ ریکارڈ کیا۔ ادارے نے سوشل میڈیا پلیٹ فارم ‘ایکس’ پر بتایا کہ دونوں گولز کے فوری بعد پیدا ہونے والی یہ لہریں شائقین کے والہانہ جشن کا نتیجہ تھیں۔

تاہم، میکسیکو سٹی میں اس تاریخی فتح کا جشن اس وقت سوگ میں بدل گیا جب سڑکوں پر نکلنے والے لاکھوں افراد کے بے قابو ہجوم میں شدید دباؤ کے باعث اچانک بھگدڑ مچ گئی۔ انتظامیہ کے مطابق اس افسوسناک واقعے میں دب کر 3 افراد اپنی جان سے ہاتھ دھو بیٹھے۔ واضح رہے کہ اس میچ میں میکسیکو نے ایکواڈور کو 0-2 سے شکست دے کر ورلڈ کپ کے آخری 16 (راؤنڈ آف 16) مرحلے کے لیے کوالیفائی کیا ہے