اسپتال انتظامیہ کی غفلت، زندہ بچی مردہ قرار، ڈیتھ سرٹیفکیٹ جاری

ساہیوال کے ٹیچنگ اسپتال کی انتظامیہ کی جانب سے ایک زندہ نومولود بچی کو مردہ قرار دے کر ڈیتھ سرٹیفکیٹ جاری کرنے کا سنسنی خیز واقعہ سامنے آیا ہے، جس پر اہلخانہ نے شدید احتجاج کیا۔

ذرائع کے مطابق اسپتال انتظامیہ نے بچی کو مردہ قرار دینے کے بعد اس کے ماموں سے میت کی وصولی کے کاغذات پر دستخط بھی کروا لیے، تاہم جب میت حوالے نہ کی گئی تو اہلخانہ نے انتظامیہ پر بچی کو اغوا کرنے کا سنگین الزام عائد کر دیا۔ معاملے کی اطلاع ملتے ہی پولیس اور میڈیا کی ٹیمیں اسپتال پہنچ گئیں، اور پولیس کی بروقت مداخلت پر انتظامیہ نے بلاآخر زندہ بچی کو ورثا کے حوالے کر دیا۔ اس افسوسناک غفلت پر شدید غم و غصے کا اظہار کرتے ہوئے متاثرہ خاندان نے وزیراعلیٰ پنجاب سے ذمہ داروں کے خلاف سخت قانونی کارروائی کا مطالبہ کیا ہے۔

دوسری جانب اسپتال انتظامیہ نے اپنا موقف پیش کرتے ہوئے دعویٰ کیا ہے کہ یہ واقعہ دو مختلف خواتین کے ناموں کی مماثلت کے باعث پیش آیا۔ انتظامیہ کا کہنا تھا کہ دونوں بچیوں کی ماؤں کے نام ایک جیسے تھے، جس کی وجہ سے غلط فہمی پیدا ہوئی اور وفات پانے والی دوسری بچی کا ڈیتھ سرٹیفکیٹ غلطی سے اس خاندان کو جاری کر دیا گیا۔ اسپتال انتظامیہ کے مطابق ریکارڈ کی دوبارہ باریک بینی سے جانچ پڑتال کرنے پر معلوم ہوا کہ اس خاندان کی نومولود بچی مکمل طور پر زندہ اور محفوظ ہے، جس کے بعد دونوں بچوں کی درست شناخت کر کے زندہ بچی کو والدین کے حوالے کر دیا گیا ہے۔