پمز میں سی ٹی کورونری اینجیوگرافی سہولت فعال نہ ہونے پر وزیراعظم کا نوٹس، انکوائری کمیٹی قائم

اسلام آباد: وزیراعظم محمد شہباز شریف نے پاکستان انسٹی ٹیوٹ آف میڈیکل سائنسز (پمز) ہسپتال میں سی ٹی کورونری اینجیوگرافی کی سہولت غیر فعال ہونے پر سخت تشویش کا اظہار کرتے ہوئے اعلیٰ سطحی انکوائری کمیٹی قائم کر دی ہے۔

وزیراعظم کی ہدایت پر تشکیل دی گئی کمیٹی کی سربراہی سیکریٹری اسٹیبلشمنٹ ڈویژن کریں گے، جبکہ سیکریٹری ہیلتھ سروسز ڈاکٹر جہانزیب علی، ڈاکٹر نصرت اللہ چوہدری، پروفیسر ندیم حیات، ڈاکٹر عظمت حیات اور عمر فاروق بھی اس اہم کمیٹی کا حصہ ہوں گے۔ وزیراعظم کے مطابق کمیٹی ضرورت پڑنے پر کسی اضافی تکنیکی رکن کو شامل کرنے کی مجاز ہوگی۔

کمیٹی اس امر کی جامع تحقیقات کرے گی کہ سال 2022ء سے جدید ترین تکنیکی صلاحیت اور مشینری موجود ہونے کے باوجود پمز میں یہ مفت یا سستی طبی سہولت مریضوں کے لیے فعال کیوں نہ ہو سکی۔ اس کے ساتھ ہی تکنیکی سہولیات، درکار سافٹ ویئر اور متعلقہ انسانی وسائل کی دستیابی کا بھی جائزہ لیا جائے گا۔

تحقیقاتی کمیٹی 2022ء سے اب تک پمز میں کیے گئے سی ٹی اینجیوگرامز کے مکمل طریقہ کار، اعداد و شمار اور باہمی شعبہ جات (کارڈیالوجی اور ریڈیالوجی) کے رابطوں کا جائزہ لے گی۔ مزید برآں، یہ بات بھی جانچی جائے گی کہ آیا پمز کے مریضوں کو جان بوجھ کر نجی تشخیصی مراکز کی طرف بھیجا جاتا رہا اور کیا کسی خاص نجی مرکز کو فائدہ پہنچایا گیا۔ وزیراعظم نے تاکید کی ہے کہ عدم رابطہ کاری، غفلت اور بدانتظامی کے تمام ذمہ داران کا تعین کر کے جلد رپورٹ پیش کی جائے تاکہ ملوث افراد کے خلاف قانون کے مطابق سخت کارروائی ہو سکے۔