طالبان رجیم کیخلاف مسلح مزاحمت میں مزید شدت آگئی

افغانستان میں طالبان حکومت کے خلاف مخالف گروہوں اور مسلح مزاحمتی تحریکوں کی کارروائیوں میں شدت آ گئی ہے، جس کے نتیجے میں طالبان رجیم کو مختلف علاقوں میں جانی و مالی نقصان اٹھانا پڑ رہا ہے۔ طالبان مخالف تنظیم ‘افغان فریڈم فرنٹ’ (AFF) کا دعویٰ ہے کہ صوبہ بدخشاں کے دارالحکومت فیض آباد میں گورنر آفس اور طالبان کی سیکیورٹی پوسٹ کو راکٹوں سے نشانہ بنایا گیا، جس کے نتیجے میں 9 طالبان اہلکار ہلاک و زخمی ہوئے۔

اس کے علاوہ، ایک اور مزاحمتی تحریک ‘دی گرین ٹرینڈ’ کے مطابق صوبہ تخار کے ضلع چہ آب میں طالبان کے ٹھکانے پر حملہ کر کے شدید نقصان پہنچایا گیا۔ دفاعی تجزیہ کاروں اور ماہرین کا کہنا ہے کہ شمالی اور شمال مشرقی افغان صوبوں بشمول بدخشاں، ہرات اور تخار میں افغان فریڈم فرنٹ اور دیگر مسلح گروہوں کے بڑھتے ہوئے رابطے اور منظم حملے طالبان مخالف اتحاد کی جنگی صلاحیتوں اور منصوبہ بندی کا واضح ثبوت ہیں، جس سے خطے میں عسکری صورتحال مزید کشیدہ ہو رہی ہے