سندھ میں 80 فیصد آبادی آلودہ پانی پینے پر مجبور ہے: مصطفیٰ کمال

وفاقی وزیر مصطفیٰ کمال نے کراچی میں ایک تقریب سے خطاب کرتے ہوئے انکشاف کیا ہے کہ سندھ میں 80 فیصد آبادی آلودہ پانی پینے پر مجبور ہے، جس کی وجہ سے خطے میں 80 فیصد بیماریاں جنم لے رہی ہیں۔ انہوں نے کہا کہ پینے کے صاف پانی کی بنیادی سہولت کا نہ ہونا افسوسناک ہے جبکہ ہیلتھ کیئر کا شعبہ انتہائی حساس ہے جہاں مریض علاج کی امید لے کر آتا ہے۔

مصطفیٰ کمال نے سیکنڈری ہسپتال کی نئی عمارت کا ذکر کرتے ہوئے کہا کہ اس اقدام سے سرکاری زمین قبضے سے محفوظ ہو کر عوام کو طویل عرصے تک صحت کی سہولیات فراہم کرے گی۔ انہوں نے انتظامی امور کو بہتر بنانے کے لیے مزید انتظامی یونٹس کی تشکیل پر زور دیا اور واضح کیا کہ نئے یونٹس بنانے کا مقصد تقسیم نہیں بلکہ بہتری لانا ہے، جیسے وقت کے ساتھ گھر وسعت مانگتا ہے لیکن خاندان قائم رہتا ہے۔