امریکا ایران کشیدگی کم کرانے میں پاکستان کا کردار سراہا گیا: گورنر پنجاب

لاہور: گورنر پنجاب سردار سلیم حیدر خان نے کہا ہے کہ پاکستان دنیا بھر میں امن و استحکام کا خواہاں ہے اور امریکہ ایران کشیدگی کم کرانے میں پاکستان کی فوجی اور سول قیادت کے تعمیری کردار کو عالمی برادری کی جانب سے بھرپور پذیرائی ملی ہے۔

جرمن سفیر سے ملاقات کے دوران گفتگو کرتے ہوئے گورنر پنجاب نے کہا کہ امریکہ اور ایران کے درمیان جاری کشیدگی کی وجہ سے پاکستان سمیت دنیا بھر کی معیشت متاثر ہوئی ہے۔ انہوں نے جی ایس پی پلس (GSP Plus) کی حیثیت کی مسلسل حمایت کرنے پر جرمن حکومت کا شکریہ ادا کرتے ہوئے کہا کہ دونوں ممالک کے درمیان تجارت، زراعت اور تعلیم جیسے شعبوں میں تعلقات کو مزید فروغ دینے کی ضرورت ہے۔

سردار سلیم حیدر خان نے جرمن جامعات کے تعلیمی معیار کی تعریف کرتے ہوئے کہا کہ پاکستانی طلبا بڑی تعداد میں اعلیٰ تعلیم کے لیے جرمنی کا رخ کرتے ہیں، لہٰذا دونوں ممالک کی یونیورسٹیوں کے درمیان سٹوڈنٹ ایکسچینج پروگرامز شروع کیے جانے چاہئیں۔

ملاقات کے دوران جرمن سفیر نے پاکستان کے ساتھ دوطرفہ تعلقات کو مزید مضبوط بنانے اور تعلیمی، تجارتی و زرعی شعبوں میں باہمی تعاون کو وسیع کرنے کے عزم کا اعادہ کیا۔