بانی کی ہسپتال منتقلی کا معاملہ، سپریم کورٹ میں توہینِ عدالت کی درخواست دائر

پاکستان تحریکِ انصاف نے بانی پی ٹی آئی عمران خان کی ہسپتال منتقلی کے عدالتی حکم پر عملدرآمد نہ ہونے پر سپریم کورٹ آف پاکستان میں توہینِ عدالت کی درخواست دائر کر دی ہے۔ وکیل عزیر بھنڈاری اور سلمان اکرم راجہ کی جانب سے دائر کردہ اس درخواست میں موقف اپنایا گیا ہے کہ عدالتِ عظمیٰ کے 18 اگست 2026 کے واضح حکم کی خلاف ورزی کی گئی ہے، لہٰذا ذمہ داران کے خلاف آئین و قانون کے مطابق توہینِ عدالت کی کارروائی شروع کی جائے۔

درخواست میں استدعا کی گئی ہے کہ عدالت تمام متعلقہ حکام اور توہینِ عدالت کے مرتکبین کو شوکاز نوٹس جاری کرتے ہوئے ذاتی حیثیت میں طلب کرے۔ اس کے ساتھ ہی بانی پی ٹی آئی کو فوری طور پر شفا انٹرنیشنل ہسپتال اسلام آباد منتقل کرنے، وہاں ان کا مکمل طبی معائنہ کرانے اور عدالتی احکامات پر عملدرآمد یقینی بنانے کے لیے لوکل کمیشن یا عدالتی افسر مقرر کرنے کی مانگ بھی کی گئی ہے۔ واضح رہے کہ سپریم کورٹ نے اس کیس کی مزید سماعت 16 ستمبر تک ملتوی کر رکھی ہے۔