عمران خان کے علاج سے متعلق عدالتی فیصلہ ردی کی ٹوکری میں پھینک دیا گیا: سہیل آفریدی

ہنگو: وزیراعلیٰ خیبرپختونخوا سہیل آفریدی نے بانی پی ٹی آئی کے طبی معائنے سے متعلق عدالتی فیصلوں پر عملدرآمد نہ ہونے پر شدید تنقید کرتے ہوئے 27 اگست کو اسلام آباد کی جانب احتجاجی لانگ مارچ کا باضابطہ اعلان کر دیا ہے۔

ہنگو میں سٹریٹ موومنٹ کے شرکا سے خطاب کرتے ہوئے سہیل آفریدی نے کہا کہ بانی پی ٹی آئی کے علاج کے لیے تین ججز پر مشتمل بینچ کے واضح احکامات کو انتظامیہ نے نظر انداز کر دیا ہے۔ انہوں نے موقف اپنایا کہ اپوزیشن رہنماؤں کے خلاف عدالت، ایف آئی اے یا پولیس کے احکامات پر منٹوں میں عملدرآمد کیا جاتا ہے، جبکہ پاکستان تحریک انصاف کے بانی کو علاج کے حق سے بھی محروم رکھا جا رہا ہے۔

وزیراعلیٰ خیبرپختونخوا نے کہا کہ ملک میں طاقتور اور کمزور کے لیے الگ الگ قوانین قائم ہیں، جس کے خاتمے کے لیے ان کی پارٹی جدوجہد کر رہی ہے۔ انہوں نے ملک میں بڑھتی ہوئی افراطِ زر اور معاشی ابتری پر بھی تشویش کا اظہار کیا۔

اپنے خطاب کے اختتام پر سہیل آفریدی نے اعلان کیا کہ 27 اگست کو خیبرپختونخوا سمیت ملک بھر سے لاکھوں افراد اسلام آباد کی طرف مارچ کریں گے تاکہ آئین کی بالادستی اور بانی پی ٹی آئی کے قانونی حقوق کا تحفظ یقینی بنایا جا سکے۔