ایشوریہ رائے کا گانا نصاب میں شامل کرنے پر بی جے پی حکومت کی شامت آ گئی

بھارتی ریاست اڑیسہ میں بھارتیہ جنتا پارٹی (بی جے پی) کی حکومت کی جانب سے اسکول کی نصابی کتابوں میں شدید نوعیت کی غلطیاں سامنے آنے کے بعد ایک بڑا تعلیمی اور ثقافتی تنازع کھڑا ہو گیا ہے، جس کے باعث مودی سرکار کو سخت سبکی اور تنقید کا سامنا ہے۔

تازہ ترین واقعے میں، اڑیسہ حکومت نے آٹھویں جماعت کے آرٹ ایجوکیشن (فنکارانہ تعلیم) کے نصاب کی کتاب ‘کیرتی’ میں بالی ووڈ کا مشہور اور تجارتی گانا ‘نمبوڑا نمبوڑا’ شامل کر دیا۔ یہ کتاب بھارت کی ‘قومی تعلیمی پالیسی 2020ء’ کے مروجہ قوانین کے تحت تیار کی گئی تھی۔ گانے کی شمولیت پر عوامی اور سیاسی سطح پر شدید غم و غصے کا اظہار کیا جا رہا ہے، اور سوشل میڈیا پر مودی سرکار کی نااہلی کا مذاق اڑایا جا رہا ہے۔

رپورٹس کے مطابق، یہ نصابی کتب شدید ترین غلطیوں سے بھری پڑی ہیں۔ اسکول کی کتابوں میں جہاں ایک طرف بالی ووڈ کے کمرشل گانے شامل کیے گئے ہیں، وہیں دوسری طرف تاریخ اور سائنس کے حقائق کو بھی مسخ کیا گیا ہے۔ کتابوں میں شہرہ آفاق سائنس دان سر آئزک نیوٹن کو “دنیا کا عظیم ترین پائلٹ” قرار دیا گیا ہے، جبکہ ریاست کرناٹک کے اسمبلی ہال کی تصویر کو اڑیسہ کی اسمبلی اور ‘ہیمپی’ کی تاریخی تصویر کو کونارک کا سورج مندر بتایا گیا ہے۔ اس سنگین معاملے پر عوامی احتجاج کے بعد اڑیسہ کے وزیراعلیٰ نے انکوائری کا حکم دیتے ہوئے 4 اعلیٰ حکام کو معطل کر دیا ہے اور کتابوں کی دوبارہ چھپائی کی ہدایت کی ہے۔