انسان اور ریچھ کی انوکھی دوستی، 150 کلو وزنی ماسا اب بھی گود میں بیٹھنے کی ضد کرتی ہے

ریچھ کو دنیا کے طاقتور ترین اور خطرناک جنگلی جانوروں میں شمار کیا جاتا ہے، لیکن یورپی ملک بوسنیا و ہرزیگووینا میں ایک شخص اور مادہ ریچھ کی انوکھی دوستی نے دنیا بھر کی توجہ اپنی جانب مبذول کرا لی ہے۔

پیٹر ٹیوبک اور مادہ ریچھ ’ماسا‘ کی اس انوکھی دوستی کا آغاز 2019 میں ہوا، جب پیٹر نے جنگل میں تنہا چھوڑی جانے والی اس ننھی ریچھ کو دیکھا اور اپنے گھر لے آئے۔ اس وقت ماسا کا وزن محض 2 کلوگرام تھا اور جنگل میں اس کا تنہا زندہ بچنا ناممکن تھا۔ پیٹر نے دودھ اور پھلوں کے ذریعے اس کی دیکھ بھال کی اور اسے بڑا کیا۔ وقت گزرنے کے ساتھ ماسا کا وزن بڑھ کر 150 کلوگرام ہو چکا ہے، تاہم اس کے باوجود وہ اب بھی بچپن کی عادت برقرار رکھے ہوئے ہے اور اکثر پیٹر کی گود میں بیٹھنے کی کوشش کرتی ہے۔ پیٹر کا کہنا ہے کہ ریچھوں کے ساتھ کھیلتے ہوئے اکثر کپڑے پھٹ جاتے ہیں یا جسم پر خراشیں آ جاتی ہیں۔

ماسا کے علاوہ پیٹر نے ایک اور مادہ ریچھ ’لوبیتسا‘ کو بھی پال رکھا ہے، جبکہ ان کے پاس دو بھیڑیے، ہرن، ریکون اور دیگر جانور بھی موجود ہیں۔ پیٹر کی اہلیہ اور 9 سالہ بیٹی بھی اس انوکھے خاندان کا حصہ ہیں۔ پیشے کے اعتبار سے الیکٹریشن پیٹر ٹیوبک اب ان ریچھوں کو واپس جنگل میں چھوڑنے پر غور کر رہے ہیں، تاہم انہیں خدشہ ہے کہ انسانوں سے حد سے زیادہ مانوس ہو جانے کی وجہ سے جنگل میں ان کی زندگی خطرے میں پڑ سکتی ہے۔ فی الحال دونوں ریچھ پیٹر کے ساتھ ہی رہ رہے ہیں اور ماؤنٹ اوزرین میں واقع ان کا گھر سیاحوں کی بڑی توجہ کا مرکز بنا ہوا ہے۔