بھارتی اداکارہ کریشی تھاپنڈا کے گھر سے تاجر کی لاش برآمد

بھارتی ریاست کرناٹک سے تعلق رکھنے والی معروف کنڑ اداکارہ کرشی تھاپنڈا کے گھر سے ایک مقامی تاجر کی لاش برآمد ہوئی ہے، جس کے بعد پولیس نے واقعے کی باقاعدہ تحقیقات کا آغاز کر دیا ہے۔ بھارتی میڈیا کی رپورٹس کے مطابق، 45 سالہ تاجر ویشاک 24 جون کی رات بنگلورو کے علاقے راج راجیشوری نگر میں واقع اداکارہ کرشی تھاپنڈا کے فلیٹ میں مردہ حالت میں پایا گیا۔ پولیس حکام کا کہنا ہے کہ ابتدائی معلومات اور شواہد سے یہ بات سامنے آئی ہے کہ مذکورہ تاجر شدید ذہنی دباؤ اور ڈپریشن کا شکار تھا اور اس کا اداکارہ کے فلیٹ پر اکثر آنا جانا تھا، جبکہ افسوسناک واقعے کے وقت وہ اپارٹمنٹ میں اکیلا ہی موجود تھا۔

پولیس کی تفتیشی ٹیم کے مطابق، جائے وقوعہ سے تاحال کوئی خودکشی کا نوٹ (سوسائیڈ نوٹ) یا ویڈیو پیغام برآمد نہیں ہوا ہے، تاہم تکنیکی اور بیانات کے شواہد سے معلوم ہوا ہے کہ ویشاک نے انتہائی قدم اٹھانے سے چند لمحے قبل اپنی قریبی دوست اور اداکارہ کرشی تھاپنڈا سے فون پر رابطہ کیا تھا۔ فون کال کے دوران تاجر نے اداکارہ کو واضح طور پر بتایا تھا کہ وہ شدید ذہنی تناؤ کے باعث اپنی زندگی ختم کرنے کا ارادہ رکھتا ہے۔

پولیس نے مزید تصدیق کی ہے کہ فون پر اس تشویشناک اطلاع کے ملتے ہی اداکارہ کرشی تھاپنڈا نے فوری طور پر ویشاک کے اہلِ خانہ کو صورتحال سے آگاہ کیا اور انہیں اپارٹمنٹ پہنچنے کا کہا۔ اداکارہ کی اطلاع پر تاجر کے خاندان کے افراد فوری طور پر راج راجیشوری نگر میں واقع فلیٹ پر پہنچے، لیکن بدقسمتی سے ان کے پہنچنے سے قبل ہی ویشاک مبینہ طور پر خودکشی کر چکا تھا۔ مقامی پولیس نے لاش کو تحویل میں لے کر پوسٹ مارٹم کے لیے منتقل کر دیا ہے اور واقعے کے تمام پہلوؤں کا تفصیلی جائزہ لیا جا رہا ہے۔