وکلاء نظامِ انصاف پر عوامی اعتماد مضبوط بنانے میں کردار ادا کریں: چیف جسٹس یحییٰ آفریدی

چیف جسٹس آف پاکستان یحییٰ آفریدی سے سپریم کورٹ میں بلوچستان کے 51 وکلاء پر مشتمل وفد نے ملاقات کی، جو فیڈرل جوڈیشل اکیڈمی کے مسلسل قانونی تعلیم کے تربیتی پروگرام میں شرکت کر رہے ہیں۔ بلوچستان بار کونسل کی جانب سے کوئٹہ، تربت، خضدار، چمن اور سبی سمیت مختلف اضلاع سے نامزد کردہ اس وفد سے گفتگو کرتے ہوئے چیف جسٹس نے وکلاء کی پیشہ ورانہ استعداد کار اور اخلاقی معیارات کی پاسداری پر زور دیا اور انہیں عدلیہ کے سفیر قرار دیا۔ انہوں نے بتایا کہ ‘انصاف تک رسائی ترقیاتی فنڈ’ کے تحت ملک بھر کے عدالتی کمپلیکسز اور بار رومز میں سولرائزیشن، ای لائبریریز اور خواتین کے لیے سہولیات کا کام مکمل کیا جا چکا ہے۔ چیف جسٹس نے وکلاء کو جدید ٹیکنالوجی، آن لائن اکیڈمی کورسز سے استفادہ کرنے اور نظامِ انصاف پر عوام کا اعتماد بحال رکھنے کی ہدایت کی-