پرائیویٹ حج اسکیم میں 80 فیصد بکنگ مکمل: عازمین نے 57.5 ارب روپے جمع کروا دیے، وزارتِ مذہبی امور کی ہدایت

وزارتِ مذہبی امور کے ترجمان کے مطابق سرکاری سکیم کی تکمیل کے بعد پرائیویٹ حج اسکیم کی بکنگ میں شدید تیزی آ گئی ہے، جہاں اب تک 80 فیصد بکنگ مکمل ہو چکی ہے اور صرف 15 ہزار نشستیں باقی رہ گئی ہیں۔ پرائیویٹ عازمینِ حج نے واجبات کی مد میں 57.5 ارب روپے جمع کروائے ہیں، جن میں ون لنک PSID اور بینک کارڈ سے 30 ارب جبکہ مینول بینک چالان سے 27.5 ارب روپے وصول ہوئے ہیں۔ ترجمان نے واضح کیا کہ امسال 55 ہزار روپے قربانی کے اخراجات حج پیکج میں پہلے سے شامل ہیں۔ انہوں نے عازمین کو ہدایت کی کہ باقی نشستوں کی بکنگ جلد از جلد پاک حج ایپ یا حج پورٹل کے ذریعے مکمل کریں اور تمام تر ادائیگیاں صرف پورٹل کے ذریعے ہی کریں؛ کسی فرد یا کمپنی کو براہ راست ادائیگی کرنے پر وزارت ذمہ دار نہیں ہو گی۔