ریلوے نے آؤٹ سورس ٹرینوں میں بھی رعایتیں دینا لازمی قرار دے دیا

پاکستان ریلویز نے دیگر عام ٹرینوں کی طرح آؤٹ سورس کی گئی ٹرینوں میں بھی مسافروں کو مقررہ قواعد کے مطابق رعایتیں فراہم کرنا لازمی قرار دے دیا ہے۔ پاکستان ریلویز ہیڈکوارٹرز لاہور کی جانب سے جاری ہدایات کے مطابق آؤٹ سورس ٹرینوں میں معمر افراد، معذور افراد، صحافیوں، اور ریلوے ملازمین کو رعایتی ٹکٹ، پاسز اور پی ٹی اوز (PTOs) کی سہولت یکساں طور پر حاصل رہے گی۔ اس کے علاوہ ٹرین کی روانگی سے 48 گھنٹے قبل تک رعایتی کوٹے کی سہولت بھی برقرار رکھی جائے گی۔ ریلوے حکام نے واضح کیا کہ اگر آؤٹ سورس ٹرین انتظامیہ کی جانب سے جائز رعایت دینے سے انکار کیا جائے تو مسافر فوری طور پر متعلقہ ریلوے حکام یا پاکستان سٹیزن پورٹل پر اپنی شکایت درج کروا سکتے ہیں۔