ایران امریکا معاہدہ: پاکستان سٹاک مارکیٹ 4640 پوائنٹس کا زبردست اضافہ

ایران اور امریکہ کے درمیان طے پانے والے تاریخی امن معاہدے کے مثبت اثرات عالمی منڈیوں کے ساتھ ساتھ مقامی سرمایہ کاری پر بھی نمایاں ہونا شروع ہو گئے ہیں، جس کے باعث پاکستان سٹاک مارکیٹ (پی ایس ایکس) میں زبردست تیزی کا رجحان دیکھا گیا اور ہنڈرڈ انڈیکس ایک لاکھ 77 ہزار پوائنٹس کی نفساتی حد پار کر گیا ہے۔ کاروباری ہفتے کے پہلے روز ٹریڈنگ کے آغاز سے ہی انویسٹرز کی جانب سے زبردست جوش و خروش دیکھنے میں آیا، جہاں مارکیٹ نے یکدم 4500 سے زائد پوائنٹس کی چھلانگ لگائی اور کے ایس ای 100 انڈیکس ایک لاکھ 76 ہزار 917 پوائنٹس کی سطح پر پہنچ گیا۔ فلور پر یہ مثبت اور جارحانہ رجحان پورے کاروباری دن کے دوران مستحکم رہا، جس کے نتیجے میں مارکیٹ کے اختتام پر انڈیکس مجموعی طور پر 4639 پوائنٹس کے بھاری اضافے کے ساتھ ایک لاکھ 77 ہزار 39 پوائنٹس کی نئی تاریخی بلند ترین سطح پر بند ہوا، جبکہ گزشتہ کاروباری ہفتے کے آخری روز انڈیکس ایک لاکھ 72 ہزار 399 پوائنٹس پر بند ہوا تھا۔

دوسری جانب، تہران واشنگٹن امن معاہدے اور خطے میں جنگ بندی کے اس بڑے بریک تھرو کی بدولت نہ صرف پاکستان بلکہ تمام ایشیائی سٹاک مارکیٹس میں بھی تیزی کی شاندار لہر دوڑ گئی ہے۔ عالمی خبر رساں اداروں کی رپورٹس کے مطابق، جنوبی کوریا کے کوسپی (KOSPI) انڈیکس میں 5.27 فیصد کا غیر معمولی اضافہ ریکارڈ کیا گیا ہے، جبکہ جاپان کا معتبر نکی (Nikkei) انڈیکس بھی 5 فیصد سے زائد کی تیزی کے ساتھ بند ہوا۔ اسی طرح انڈونیشیا کے جکارتہ کمپوزٹ انڈیکس میں 2 فیصد، چین کے شنگھائی کمپوزٹ انڈیکس میں 1 فیصد اضافہ دیکھا گیا جبکہ ہانگ کانگ کے ہینگ سینگ انڈیکس میں بھی معمولی برتری ریکارڈ کی گئی، جو اس بات کا ثبوت ہے کہ اس تزویراتی معاہدے نے عالمی معیشت اور سرمایہ کاروں کے اعتماد کو نئی زندگی بخشی ہے۔