ملک بھر میں سونے کی قیمت میں بڑا اضافہ

ایران اور امریکہ کے درمیان تاریخی امن معاہدہ طے پانے کے بعد عالمی اور مقامی صرافہ مارکیٹوں میں سونے کی قیمتوں میں غیر معمولی تیزی دیکھی جا رہی ہے۔ آل پاکستان صرافہ جیمز اینڈ جیولرز ایسوسی ایشن کے مطابق، پاکستان میں 24 کیرٹ سونے کی فی تولہ قیمت میں 10 ہزار 800 روپے کا بڑا اضافہ ہوا ہے، جس کے بعد نئی قیمت 4 لاکھ 55 ہزار 136 روپے کی بلند سطح پر پہنچ گئی ہے۔

اسی طرح 10 گرام سونے کے نرخوں میں بھی 9 ہزار 720 روپے کا اضافہ ریکارڈ کیا گیا، جس کے بعد 10 گرام سونا 3 لاکھ 89 ہزار 600 روپے میں فروخت ہو رہا ہے۔ چاندی کے داموں میں بھی تیزی کا رجحان برقرار ہے اور فی تولہ چاندی 230 روپے اضافے کے بعد 7 ہزار 509 روپے کی سطح پر پہنچ گئی ہے۔

عالمی مارکیٹ میں بھی ایران-امریکہ امن معاہدے کے اثرات نمایاں ہیں، جہاں فی اونس سونے کی قیمت میں 108 ڈالر کا نمایاں اضافہ ہوا، جس کے بعد عالمی منڈی میں سونا 4327 ڈالر فی اونس کی قیمت پر ٹریڈ کر رہا ہے۔ ماہرین کے مطابق، جیو پولیٹیکل صورتحال میں بہتری اور عالمی منڈیوں میں غیر یقینی کے باعث سرمایہ کاروں کا رجحان سونے کی جانب بڑھ گیا ہے، جس سے قیمتوں میں یہ تیزی دیکھنے میں آئی ہے۔